ಮತ್ತೇಕೆ ಕಾಡುತಿದೆ....?

ಮತ್ತೇಕೆ ಕಾಡುತಿದೆ....?
---------------------
ದಟ್ಟ ಕಾಡಿನುದ್ದಕ್ಕೂ ನೆಟ್ಟ
ಸಾಲು ಸಾಲು ಮರಗಳ
ನೆತ್ತಿ ಮುತ್ತಿಡುವ ನೀಲಬಾನು
ಕಂಗೊಳಿಸುತಿಹುದು ಅರಳು ಮಲ್ಲಿಗೆಯ
ನಗು ನಗುವಿನ ಹೂ ಕಮಾನು
ಸಾಗರದ ತೆರೆಯ
ತೆರೆಮರೆಯ ಆಟದಲಿ
ಮುಚ್ಚಾಲೆಯಾಡಿ ಚುಕ್ಕೆ
ಎದ್ದೆದ್ದು ಕುಣಿದು ಕುಪ್ಪಳಿಸಿದ್ದು
ತೀರದೆಡೆ ಸೇರುವವು
ಮಳಲು ತೆಕ್ಕೆ !

ಚೆಂದಿರನ ಬೆಳದಿಂಗಳ
ಹಾಸಿಗೆ ಹಾಸಿರುವ ಪೂರ್ಣ ರಾತ್ರಿ
ಮಳಲು ಮಂಚದೆಡೆ
ನೂತನದ ಅಭಿಸಾರ !
ಸಮ್ಮೋಹನ ಧಾತ್ರಿ ತಂಗಾಳಿಯೊಡನೆ
ಸರಸ ಸಲ್ಲಾಪ ಸಾಕು ಬಿಡು
ಸಾಕು ಆ ಕಡಲ ಸೆಳೆತ !
ನಾ ಕೇಳಲಾರೆ ನಿನ್ನೊಂಟಿದನಿ ಮಿಡಿತ
ಸೊಬಗಿನಡೆಗೆಯ ತುಡಿತ
ನೆಲದೊಡಲ ಬಗೆದು
ಮೇಲೇರಿ ಮುಗಿಲೇರಿ
ಅಲೆಯುತ್ತಿರುವ ಮಧುರ ನೆನಪ
ಮತ್ತೇಕೆ ಕರೆ ಕರೆದು ಕಾಡುತಿದೆ
ಸುಮ್ಮನೆಯ ಸೊಬಗಿನಡೆಗೆ